Читаем Типикон полностью

На Велицей Вечерни, по внегда кадити иерею, и рещи ему: Слава, святей и единосущней: поет: Христос воскресе: трижды, и стихи его. Слава, и ныне: Христос воскресе: трижды, таже ектениа. На Господи воззвах, стихиры воскресны 3: и анатолиев 1, и праздника 6, Слава, и ныне, праздника: Послан бысть: Вход, Свете тихий: Прокимен, глас 6: Кто Бог велий, яко Бог наш: со стихи его, и чтений праздника 5. [Аще в неделю вечера: посем иерей: И о сподобитися нам: евангелие Иоанна, зачало 65: Сущу позде в день той: Конец: Не иму веры.] таже, ектениа. На литии стихиры самогласны праздника: Слава, и ныне, благовествует гавриил: На стиховне стихира воскресна едина, таже припев: Да воскреснет бог: и поем стихиры пасхи, с припевы их. Слава, праздника: Днесь радость: И ныне, пасхи: воскресния день: и на конец: Христос воскресе: трижды. Тропарь праздника, трижды, и благословение хлебов, и раздаяние, и чтение праздника. На Утрени, по внегда благословити иерею, и рещи: Христос воскресе: трижды, и стихи его, и по скончании, Слава, тропарь праздника: И ныне, тойже. Таже, ектениа великая, и полиелей, и седален, и чтение праздника. Степенна, 1–й антифон 4–го гласа. Прокимен, и евангелие праздника. воскресение христово: трижды. псалом 50 не глаголем, но абие: Слава: молитвами Богородицы: И ныне, тойже. посем припев на глас 6: благовестите день от дне: и поем стихиру самогласну праздника, глас 6: Послан бысть: таже молитва: спаси Боже люди твоя: и Господи помилуй, 12. и по возгласе, Канон пасхи со ирмосом на 6: и праздника, со ирмосом на 8: ирмосы пасхи и праздника, по дважды. Катавасиа благовещения, ирмос, оба лика вкупе. По 3–й песни, кондак и икос пасхи, и седален праздника. По 6–й песни, кондак и икос праздника, и чтение дне: таже воскрес Иисус: трижды. На 9–й песни припевы пасхи, и праздника. Светилен пасхи единожды, и праздника дважды. На хвалитех стихиры воскресны гласа три: и праздника подобны три. Таже, да воскреснет бог: и поем стихиры пасхи, с припевы их. Слава, праздника: Да веселятся небеса: И ныне, пасхи: воскресния день: Христос воскресе: трижды.] Слава, и ныне: тропарь праздника. ектении, и отпуст. и дается святый елей братии: и бывает литиа вне обители. Часы же поем по обычаю пасхи. На Литургии, антифоны пасхи. По входе глаголем стих: В церквах благословите бога Господа: Христос воскресе: трижды. тропарь праздника. Слава, кондак пасхи: И ныне, праздника. Вместо трисвятаго, елицы во Христа крестистеся: Прокимен, апостол, Аллилуиа, и евангелие, прежде благовещения, таже дне. и по ряду божественная литургиа златоустаго. Причастен дне, и праздника.

[Смотри] Известно же да будет, яко не своим смотрением, о еже како пети подобает благовещению, во дни святыя четыредесятницы, и в седмице великия недели, на святую пасху, службу, еже о сем повелено бысть.

Ибо типику великия церкве последовавше известно, и синаксарий видевше честныя обители студийския, и прочих, еще же и иерусалимския типики прошедше, сия вчинихом. и никтоже убо да дивится пременению бываему, стихирам же и канонам, и чтениям, прокименом же и апостолом, аллилуиам, и евангелиам и причастнам, еже тако пременити повелено есть: но день да сматряет, егда навечерие благовещения бывает: такожде и день праздника есть, и обрящеши, яко егда в постен день навечерие случится, чести ради святыя четыредесятницы, поем стихиры дне, и потом благовещения: и литургии преждесвященных. Оттуду же приимет начало праздника, вся предваряют благовещения.

[Смотри] Подобает ведати, яко аще случится праздник сей в кийлибо день великия недели, или в субботу лазареву, или в неделю цветоносную.

Прежде вчинихом благовещения службу, понеже прежде страсти христовы быти сему празднику, за еже не быти посту в нем. Паки же в великия дни седмицы разсудихом: аще случится в них благовещение, на вечерни предваряет стихиры дне, и потом благовещения, поста ради, якоже прежде рехом, и за преславное дне. Быти же в великий пяток и проскомидии вчинихом, аще случится благовещение: аще бо и правила инако повелевают, но обретохом в соборней велицей церкви, в молебных храмех Богородицы, бывати с просфорами службе совершенней: темже сия сице и в великий пяток литургию златоустову вчинихом.

указ о отдании благовещения пресвятыя Богородицы: [Смотри] Подобает ведати, аще случится благовещение в пяток 3, или 4–я недели постов.