Читаем Типикон полностью

И икос, и пролог. По 9–й песни, светилен октоиха. Слава, мученков: Чудныя воспоем: И ныне, креста: крест хранитель: На хвалитех, стихиры на 6: креста 3, глас 1. Подобен: небесных чинов: и святых 3, самогласны, глас тойже. Слава, глас 4: На маккавеи собравшуюся рать: И ныне, креста, глас тойже: Пособивый Господи кроткому давиду: Славословие великое тихо, и со гласом. иерею же облечену сущу во всю одежду священническую, приходит с кадилом к святей трапезе, предходящу ему диакону с лампадою, и кадит святую трапезу и честный крест: и тако взимает честный крест с блюдом на главу, и исходит северными дверьми из олтаря, предыдущим ему со двема лампадами, и с кадилом: приходит же прямо царских дверей, и стоит, ожидая конца трисвятаго. кончаваему же трисвятому, возглашает иерей: Премудрость, прости. И клирицы поют тропарь: спаси Господи люди твоя: трижды. и тако приходит иерей, нося на главе честный крест пред святыя царския двери ко аналогию, емуже украшену сущу, полагает на нем честный крест, и творит поклонение честному кресту, трижды, поя тихогласно: кресту твоему покланяемся владыко, и святое воскресение твое славим. И ликове тоже поют велегласно, трижды. и начинают покланятися, аще во обители, игумен или ин первенствуяй во священных. Такожде и прочии священницы, покланяющеся пред честным крестом дважды. целует же прежде старейший: и по целовании паки покланяются единожды. такожде творят и прочии священницы, десная страна и левая: такожде приходят и братия два два, покланяющеся по чину их. кланяющимся же братиям, Поем стихиры самогласны, глас 2, Приидите вернии: глас 5: Зрящи тя тварь: глас 8: Днесь владыка твари: Слава, и ныне, глас тойже: Днесь неприкосновенный: Посем ектении: Помилуй нас Боже, и Исполним утреннюю молитву: и час 1–й. На часех, тропарь креста. Слава, святых: И ныне, богородичен часов. По Отче наш, кондак креста, и совершенный отпуст. [Смотри] В сий же 1–й день августа во обителех и приходских храмех совершают чин священия воды, и бывает сице: Приуготовану столу и украшену, и воде в чаше. Или исходим на источники. И благословившу иерею, глаголется трисвятое, и псалом 142: Господи услыши молитву мою: Таже, Бог господь: во глас 4. И тропарь: К Богородице прилежно: дважды. Слава, и ныне: Не умолчим никогда Богородице: Таже, псалом 50: Помилуй мя Боже: Посем поются тропари священия воды, глас 6: еже радуйся ангелом приимшая: И прочее по ряду священия воды, яко обычай. По отпусте же обходит иерей, и кропит внутрь монастыря, сиречь, во игуменскую келлию, и в трапезу, и келарню, и пекарню, и в винницу, и поварню, и житницы, и погреб, и во вся келлии братския, кропя и освящая всех: и возвращшеся поем час 3–й, и 6–й. [Смотри] А идеже чин освящения воды совершается на Утрени, поем сице: По славословии и по трисвятом, и по тропаре: спаси Господи люди твоя: поются тропари: еже радуйся: И прочее по ряду освящение воды, яко обычай. По освящении же воды и по стихирах: Источник исцелений: и Призри на моления: и владычице приими: творим и поклонение честному кресту, яко предписася. На часех, тропарь креста. Слава, святых: И ныне, богородичен часов. По трисвятом кондаки пременяем. На Литургии, блаженна, от канона креста, песнь 3, на 4: и святых, песнь 6, на 4. По входе тропарь креста, и мученков. Слава, кондак мученков: И ныне, креста. Трисвятое. прокимен креста, глас 6: спаси Господи люди твоя: Стих: К тебе Господи воззову, Боже мой: Другий, мученков, глас 4: святым, иже суть на земли его: Апостол креста, к коринфяном, зачало 125: Слово крестное: И святых, ко евреем, зачало 330: святии вси, иже верою победиша царствия: Аллилуиа, глас 4: Помяни сонм твой, егоже стяжал еси исперва. Стих: Бог же царь наш прежде века: И святых: Воззваша праведнии: евангелие креста, Иоанна, зачало 60: Совет сотвориша архиереи и старцы на Иисуса: И святых, матфеа, зачало 38: Всяк убо иже исповесть мя пред человеки: Причастен креста: Знаменася на нас: И святых: Радуйтеся: Ряд же вычитаем напредь, или под зачало.