Читаем Типикон полностью

Поем все воследование утрени, якоже предписася в прочих. На хвалитех стихиры воскресны 4, глас 6: крест твой Господи: И стихиры пасхи, по обычаю, и отпуст, и час 1–й. Часы пасхи. На Литургии, антифоны пасхи. Прокимен, глас 8: Во всю землю изыде вещание их: Стих: небеса поведают славу божию: Апостол деяний, зачало 7: Вкупе петр и иоанн: Аллилуиа, глас 1: Исповедят небеса чудеса твоя Господи. Стих: Бог прославляемь в совете святых. евангелие Иоанна, зачало 7: Вниде Иисус в капернаум: Причастен: Тело христово приимите: [Смотри] Нецыи же в сей пяток светлыя седмицы поют последование никифора каллиста ксанфопула, на пресвятую богородицу живоприемный источник, якоже и все последование напечатася в пентикостариах: в типицех же ни в каких не обретается.

В пяток светлыя седмицы вечера.

По еже рещи, Христос воскресе: и ектению, на Господи воззвах ставим стихов 6, и поем стихиры воскресны 3, глас 8: Вечернюю песнь: И анатолиевы 3. Слава: Тя славим Господи: И ныне: богородичен: царь небесный: Вход. Свете тихий: Прокимен, глас 8: Дал еси достояние боящимся тебе Господи. Стих: от конец земли к тебе воззвах. Стих: Покрыюся в крове крил твоих. Стих: Тако воспою имени твоему во веки. И паки: Дал еси достояние: Таже, ектениа: Сподоби Господи: И прочее. На стиховне стихира воскресна, глас 8: Возшел еси на крест Иисусе: Таже стихиры пасхи с припевы их. Христос воскресе: трижды. И отпуст.

В субботу светлыя седмицы на Утрени воследование все, яко предписася.

На хвалитех стихиры воскресны на 4, глас 8: Господи, аще и судилищу предстал еси: Таже стихиры пасхи, с припевы их: Христос воскресе: трижды. ектениа, и отпуст, и час 1. Часы пасхи. На Литургии, антифоны пасхи. Прокимен апостола, глас 3: Господь просвещение мое: Стих: Господь защититель живота моего: Апостол деяний, зачало 8: Держащуся исцелевшему хромому: Аллилуиа, глас 5. Господь воцарися: Стих: Ибо утверди вселенную: евангелие Иоанна, зачало 11: Прииде Иисус и ученицы его: и прочая литургии. Причастен: Тело христово приимите: По отпусте литургии, Идущим братиям из церкве в трапезу прежде несет диакон артос, без образа воскресния Христова. Параекклисиарху же с братиею в то время ударяющим во вся звоны. В трапезе же внегда сядут братия, келарь раздробив хлеб, во всей седмице воздвизаемый, вместо пресвятыя панагиа, раздает братиям прежде обычнаго их ядения: и тако потребляем и. Первее рекше: Христос воскресе: Таже, Отче наш: и благословение обычныя трапезы, и седаем ясти, чтец же начинает чтение. На трапезе утешение велие братии. Воставше же от трапезы, поем: Христос воскресе: трижды. благословен Бог милуяй, и питаяй нас: Таже: Слава тебе Господи, слава тебе святый. Слава, и ныне, Господи помилуй, трижды. благослови. И взем диакон хлеб обычный, во всем лете возвышаемый, треми персты обема рукама, знаменует им панагиар крестовидно, глаголя, Вместо, Велико имя святыя троицы: Христос воскресе: единожды. Нам отвещающим: Воистинну воскресе. Таже наднося часть над образ Богородицы, глаголет: Пресвятая Богородице помогай нам. Мы же, Тоя молитвами Христе Боже: И глаголем: блажим тя вси роди: И ирмос 9 песни: Светися, светися: с тропари обема ея. И паки: Светися, светися: Таже глаголет настоятель, Аще же несть, глаголет иерей: В премногия мольбы преблагословенныя владычицы: Мы же речем: Тоя молитвами: иерей же, милостив и щедр господь: Мы же, Христос воскресе: трижды. Трисвятое. по Отче наш: впакои: Предварившия утро: Слава, и ныне: Аще и во гроб: Господи помилуй, трижды. благословен бог, милуяй и питаяй нас от своих богатых даров: Мы же речем: Аминь. И прощение обычное. Сице же творим и до отдания праздника пасхи.

Неделя антипасхи, еже есть осязание святаго славнаго апостола фомы.

Ведати подобает: яко в сей святой второй недели антипасхи: не поются воскресная, но вся праздника. В субботу вечера клеплет параекклисиарх, и собравшеся в притвор, благословившу иерею, глаголем, Христос воскресе, трижды: и обычный 9 час, трипсалмный, якоже на всяк день, и глаголем тропарь: С высоты снизшел еси благоутробне: и кондак: Аще и во гроб снизшел еси безсмертне: На малей вечерни, благословившу иерею, глаголем: Христос воскресе, трижды: таже псалом: благослови душе моя Господа: На Господи воззвах стихиры на 4, глас 1. Подобен: небесных чинов: Терпит Христос человеколюбно и осязания: Слава, и ныне, глас 2: По востании твоем Господи: Свете тихий: Прокимен: Господь воцарися: На стиховне стихиры, глас 2. Подобен: Доме евфрафов: устнами чистыми: Припев: Похвали Иерусалиме Господа: 2, яко укрепи вереи врат твоих. Слава, и ныне, глас 8 подобен тойже: Даеши о избавителю: Таже, Ныне отпущаеши: Трисвятое. по Отче наш: Тропарь, глас 6: Запечатану гробу, живот от гроба возсиял еси Христе Боже: и дверем заключенным, учеником предстал еси, всех воскресение, дух правый теми обновляя нам, по велицей твоей милости. И отпуст.