Читаем Служебник (цсл) полностью

Необыме́нный в ми́лости и неизрече́нный во щедро́тах, Го́споди Иису́се Христе́, ди́вен Сый во сла́ве и творя́й чудеса́. Ты, де́йством Свята́го Ду́ха иногда́ благослови́вый Изра́иля и его́ ме́дом насы́тивый от ка́мене, Сам и ны́не при́зри свы́ше на созда́ние Твое́ сие́, и благослове́нием Твои́м Небе́сным благослови́ и освяти́ со́ты пчел и от них мед, и пода́ждь ему́ де́йственну благода́ть, па́че всех соверше́нну, да всяк от него́ вкуша́яй, прие́мляй и яды́й обря́щет благополу́чное здра́вие, и пи́щею се́ю насы́тится, и испо́лнится вся́каго бла́га.

Я́ко Ты еси́ подава́яй вся́ческая блага́я и Тебе́ сла́ву возсыла́ем со безнача́льным Твои́м Отце́м и пресвяты́м и благи́м и животворя́щим Твои́м Ду́хом, ны́не, и при́сно, и во ве́ки веко́в. Ами́нь.

И кропит священною водою.

Подобает ведати: Яко предание имамы от святых отец, от спасительнаго сего праздника Преображения снедати гроздие, идеже обретается, благословение приемше от иерея. Принесену бывшу гроздию в церковь и по анафоре раздроблену.

Глаголется же сия молитва на благословение гроздия от святителя или от иерея:

Го́споду помо́лимся. Го́споди поми́луй.

Бо́же, Спаси́телю наш, благоволи́вый виногра́д нарещи́ Единоро́днаго Твоего́ Сы́на, Го́спода Бо́га и Спа́са на́шего Иису́са Христа́, и Тем плод безсме́ртия нам дарова́, Сам и ны́не пло́дный сей виногра́д благослови́ и нас, рабы́ Твоя́, вкуша́ющия от него́, И́стиннаго Виногра́да прича́стники сотвори́, неврежде́нну жизнь на́шу сохрани́, и мир нам всегда́ да́руй, и ве́чными Твои́ми неотъе́млемыми дарова́нии жизнь на́шу украси́, моли́твами Пречи́стыя Влады́чицы на́шея Богоро́дицы и Присноде́вы Мари́и и всех Твои́х святы́х, от ве́ка Тебе́ благоугоди́вших, я́ко Благ и Человеколю́бец Бог еси́, и Тебе́ сла́ву возсыла́ем, Безнача́льному Отцу́, со Единоро́дным Твои́м Сы́ном и с Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в. Ами́нь.

Влады́ко Го́споди, Бо́же наш, Твоя́ от Твои́х приноси́ти Тебе́ по предложeнию комyждо повеле́вый, и ве́чных Твои́х благ воздая́ние сим дaруяй, и́же вдовы́ по си́ле приношeние благоуго́дно приeмый, приими́ и ны́не принесе́нная от раба́ Твоего́ [или рабы́ Твоея́] имярек, и в ве́чных Твои́х сокро́вищах возложи́тися сим сподо́би. Дaруй ему́ [ей] и мирски́хъ Твои́х благ оби́льное восприя́тие, со все́ми полeзными ему́ [ей].

Я́ко благослови́ся и́мя Твое́, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Молитва над всяким плодом

Го́споди, Бо́же наш, положи́вый ве́рующим в Тя по́льзование творе́нии Твои́ми, Сам благослови́ предлежа́щия плоды́ сия́ сло́вом Твои́м, мо́лимся Тебе́, ми́лостию и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в. Ами́нь.